சுப்ரபாரதி மணியன்

வாசிப்பனுபவம். #அந்நியர்கள் :#சுப்ரபாரதிமணியன் #எழுத்து_கவிதா வெளியீடு / கோவை பிரசன்னா சுபரபாரதிமணியன் கிட்டத்தட்ட நாற்பது ஆண்டுகளாக எழுதிவருபவர். எழுத்தின் எல்லா வகைகளிலும் தன் முத்திரையைப் பதித்தவர். சுற்றுச்சூழல் சம்பந்தமான விஷயங்களிலும், அதை நாவல்களில், சிறுகதைகளில் கொண்டு வருவதில் பெயர் பெற்றவர். சகமனிதர்களின் வாழ்க்கையை, அதன் அனைத்துவிதமான தாக்கங்களை இயல்பாக யதார்த்த நோக்கில் எழுதுபவர். இவரின் சாயத்திரை நாவல் பல இந்திய மொழிகளில் மொழிபெயர்க்கப்பட்டிருப்பது சிறப்பு. பல விருதுகளுக்குச் சொந்தக்காரர். நாம் காணப்போகும் இந்த #அந்நியர்கள் நாவல் "எழுத்து" இலக்கிய அமைப்பின் 2020 ஆண்டிற்கான "திருமதி சௌந்தரா கைலாசம் விருது" பெற்றது. நாவல் இவரின் பல கதைகளைப் போலவே திருப்பூரைக் கதைக்களமாகக் கொண்டது. வேலை தேடி வருவோரை வேண்டாம் என்று சொல்லாமல், இரு கரம் நீட்டி வரவேற்ற ஊர் திருப்பூர். கோவிட் சமயத்தில் இங்க வேலை செய்து, வடமாநிலங்கள் திரும்பியவர்கள் எண்ணிக்கை லட்சத்தைத் தாண்டும். நாவலில் அது போல பீகார் போன்ற மாநிலங்களில் இருந்து வந்து, திருப்பூர் வாழ் மக்களாகியவர்களின் அவஸ்தைகள், அவர்களுக்கு ஏற்படும் சுரண்டல்கள், பெண்களின் மீதான பாலியல் வன்முறை போன்றவைகளைப் பேசுகிறது. துளசி என்ற வடமாநிலப் பெண்ணைச் சுற்றி நகர்கிறது கதை. தன்னார்வலராக அந்தப் பெண் ஈடுபடும் நிகழ்வுகள், சந்திக்கும் பிரச்சினைகள், அவளைப் போல வந்து கஷ்டப்படும் பெண்களை காக்க முற்படுதல்கள், தன்னம்பிக்கை இல்லாமல் காதலித்து திடீரென்று ஓடிப்போகும் காதலன், பின்னர் தத்தளிக்கும் காதலி... சிறு பெண்களின் மீதான அத்து மீறல்கள்... இவற்றையெல்லாம் ஒன்றிணைத்து சரியான நிகழ்வுகளை புள்ளிகளாக வைத்து கோலம் தீட்டியுள்ளார் சுபரபாரதிமணியன். வண்ணக் கோலம் ஆகியிருக்கிறது. கதை முழுவதும் திருப்பூர் நகரம் வருகிறது. அதன் பனியன் கம்பெனி, அதில் வேலை செய்பவர்கள், முதலாளிகள் ரத்தமும் சதையுமாக வருகிறார்கள். பரிசுக்கு நியாயம் செய்யும் நாவல். -கோவை பிரசன்னா.