சுப்ரபாரதி மணியன்

பெருங்கூட்டத்தில்  தொலைந்தவனின்  தனிமை : நாகாவின் கவிதை நூல்..

--சுப்ரபாரதிமணீயன்

வானொலியில் ” மேஸ்ட்ராலிஜி “ நிகழ்ச்சியில் எழுத்தாளர்களின் சந்திப்புக்கென்று பெயர் வாங்கியவர் நாகா. அவரின் இக்கவிதைத் தொகுப்பு முழுக்க ” நாஸ்டாலாஜியா “  கவிதைகளால் நிரம்பியிருக்கிறது. எல்லாக்கவிதைகளிலும் நினைவுகள் சார்ந்த அனுபவங்கள் அந்த அனுபவங்களை இன்றைய வாழ்வியல், விஞ்ஞானம், வளர்ச்சி, மாறுதலோடு பொருத்திப் பார்க்கும் ஏக்கமான முத்தாய்ப்பு வரிகள் அல்லது முத்துக்குளித்து எடுத்த முத்துக்கள்  என்று வடிவமைத்திருக்கிறார். அத்தனையும் முத்தான அனுபவங்கள்., சொந்த அனுபவங்களை மட்டுமில்லாமல் பிறரின் அனுபவங்களை தன் அனுபவங்கள் போல் வரித்துக் கொண்டு எழுதுகிறவனே நிறைய எழுத முடியும், விசாலப் பரப்பைச் சென்றடைய முடியும்.அது நாகாவிடம் சாத்தியமாயிருக்கிறது. எல்லாவகைக் களங்களிலும் இவ்வகை அனுபவங்கள் நாகாவுக்கு வாயத்திருக்குமா என்ற   சந்தேகம் எனக்கு வந்த போது சிறுகதைத் தன்மையைக் கொண்டுவர அவர் எடுத்துக் கொள்ளும் அனுபவங்கள் கற்றதும் பெற்றதுமாக இருப்பது மகிழ்ச்சி தந்தது.. நதிகள் பற்றியக் கவிதைகள் குறிப்பாக எங்களூர் நொய்யல் பற்றியக் கவிதையைப் படித்த போது இந்த ஆச்சர்யம் எனக்கும் ஏற்பட்டது. ஆனால் நொய்யல் பற்றிய கவிதையில் அவரின் கேட்டறிந்த அனுபவம் அந்தக்கவிதைக்குள் ஊடாடியிருப்பது தெரிந்தது.. மகிழ்ந்தேன்.  இவ்வகையில் நிறையப் படைப்புகளை சவால் தன்மையுடன் நாகாவால் தொடர்ந்து தருவதற்கான வாசல்களை இக்கவிதைகள் எனக்குச் சொல்லின. இந்நூலின் முன்னுரையில் சீ.அஞ்சுகம் மேற்கோள் காட்டும் நீண்ட பட்டியலான வரிகளை நானும் ஆமோதித்து திரும்பச் சொல்ல விழைகிறேன். தனிமையை நிராகரிக்கும் மனம் கொண்ட அனுபவங்கள் இக்கவிதைகள். பெரும்பாலும் அதிக மக்கள் திரளைச் சென்றடையும் வானொலி, சின்னத்திரை,திரைப்பட, சமூக ஊடங்களில் பணிபுரிகிறவர்கள்  குறைந்த வாசகர்களைக் கொண்ட புத்தக முயற்சிகள், படைப்பாக்க முயற்சிகளில் அதிக் அக்கறை காட்டமாட்டார்கள். ஆனால்  துபாய் வானொலியில் பணிபுரியும் நாகாவின் தொடர்ந்த படைப்பிலக்கிய முயற்சிகள் அவரின் மூலவேர் படைப்பிலக்கியத்தளத்தில் ஆழமாய் சென்றிருப்பதைக் காட்டுகிறது.அதைத்தொடர்ந்து படைப்பிலக்கியமுயற்சிகளில் வெளிப்படுத்தி வருகிறார்.

( ரூ 100, டிஸ்கவ்ரி புக் பேலஸ் சென்னை வெளியீடு   )