சுப்ரபாரதி மணியன்

கண்மணியும், அவரின் காதல் நிலமும் சுப்ரபாரதி மணியன் நல்ல பெயர் எடுக்க வேண்டும் தான்.. ஆனால் யாரிடம் நல்ல பெயர் எடுப்பது. அந்த நல்ல பெயர் முத்திரையைத் தருகிற மனிதனுடைய நியாயங்கள் எப்படி இருக்கின்றன என்று நியாயத்தின் பக்கம் எப்போதும் என்று பேசுகிறவர் கண்மணி. பணம் , அந்தஸ்து சார்ந்து அக்கறையாய் கேள்விகள் எழுப்புகிறவர். அவருடைய பெரும்பான்மையான படைப்புகளில் இந்த நியாயத்தின் அக்கறையும் அறம் சார்ந்த கருத்துகளும் இருந்திருக்கின்றன.. இந்த சிறுகதைகளில் கூட அந்த அம்சம் இருக்கிறது. அதற்காக அவர் உடன் பயணப்படுகிற கலை, இலக்கிய சக மனிதர்கள் பெருமைப்பட்டுக் கொள்ளலாம் இதன் மையங்கள் சார்ந்து.. வெளியே நீர் பரப்பாக விரிந்திருக்கும் கடல் உள்ளுக்குள் ஆயிரம் கதைகளை மறைத்து வைத்திருக்கும் என்று அவர் சொல்வது போல் கண்மணி அவர்கள் தன் திரைப்பட பணியினுடைய இப்படி ஆயிரம் கதைகளை சுமந்து கொண்டு திரிகிறார்.. அவையெல்லாம் இப்படி சிறுகதைகளாக, தொகுப்புகளாக, திரைப்படங்களாக வந்தால் நன்றாக இருக்கும் ஆனால் அவையெல்லாம் அவர் மனதில் புதைந்து கிடக்கின்றன. இதற்கு காலமும் மனிதர்களும் சரியான ஒத்துழைப்பு தர வேண்டும். இந்த கதைகளில் உள்ள மனிதர்கள் சார்ந்த சித்தரிப்புகளும் அதன் மீதான தரிசனமும், நிலம் சார்ந்த விவரிப்புகளும் இறுதியில் அது கொண்டு செல்லும் நியாயமும் கவனத்தில் கொள்ளப்பட வேண்டியவை அவரின் நிலம் சார்ந்தக் கதைகளில் இறுதியில் ஒரு மாற்றம் திருப்பம் இருந்து கொண்டிருக்கிறது இது மரப ரீதியான சிறுகதைகளின் திருப்பமாக இருக்கிறது. வடிவ ரீதியாகச் சிறுகதையை புரிந்து கொள்ளும் இளம் வாசகன் இந்த திருப்பத்தை சரியாகவே புரிந்து கொள்வான். பாவைக்கூத்க்காரர்களிடம் தென்படும் அன்பும் நியாயமும் அந்த பெண்கள் சார்ந்த கோபமும் சரியாக வெளிப்பட்டிருக்கிறது. பஸ் பயண நேரத்து மனிதர்களாகட்டும். தொழுகை நேரத்தில் தங்களை ஈடுபடுத்திக் கொள்பவர்களாகட்டும், வெளிநாட்டில் இருந்து ஊர் திருப்பி அவன் பயணப்படுகிற நேரத்தில் அவன் எதிர்கொள்ளும் மனித உறவுகள் ஆகட்டும் எல்லாவற்றையும் கூர்ந்து கவனித்து இந்த கதைகளை உருவாக்கி இருக்கிறார் களத்தில் காணப்படும் மையங்களும் அதை சொல்கிற நேர்த்தியும் எளிமையும் சிறப்பாக இருக்கின்றன. . மகிழ்ச்சியாக இருக்கிற ஒரு தருணத்தை அவர் ஒரு கவித்துவமாக சொல்கிறார் : தான் இன்றுதான் பூப்பெய்தியதாக உணர்ந்தாள் என்று. இப்படி கவித்துவமான வார்த்தைகளை ஒவ்வொரு சிறுகதைகளிலும் தேடி எடுத்துக் கொள்ளலாம் . சாவுகள் நிறைய வருகின்றன. அந்த சாவுகள் தரும் வெளிச்சப் புள்ளிகள் வித்தியாசமானவை. ஓர் ஊரின் நடப்பு விசயங்கள் சார்ந்து எழுதும் கடிதம் ஆனால் அந்த கடிதம் பயனில்லாதபடி வந்து சேரும் தந்தி .அது திரும்பத் தரும் ஒரு திருப்பம்…. இதுபோல் மனிதர்கள் கடிதம் எழுதுவது போல பேசிக் கொண்டே இருக்கிறார்கள் தங்களின் ஜீவனான மொழியில், பல சிற்பங்களை உருவாக்கிக் கொண்டே இருக்கிறார்கள், அந்தச் சிற்பங்களின் சிறப்புகள் பற்றி கண்மணி அவர்கள் தன் கதைகளை சொல்லிக் கொண்டே இருக்கிறார். இந்த திருப்பங்கள் தமிழ் இலக்கியப் பரப்பில் கவனிக்க வைக்கும் திருப்பங்களாகவும் அமைந்திருக்கிறது என்பது மகிழ்ச்சியானது சுப்ரபாரதி மணியன், திருப்பூர்