சுப்ரபாரதி மணியன்

வானம்பாடிக்குப் பின் புதுக்கவிதை : சுப்ரபாரதிமணியன் நூல் 1982 வானம்பாடி இயக்கம் தோன்றி, வெளிப்பட்டு, பரவலாக ஒரு தாக்கத்தை ஏற்படுத்திக் கொண்டிருந்த பரபரப்பான காலகட்டத்தில் பலர் அதன் இருப்பும் விளங்காமல், திசையும் தெரியாமல் இருட்டில் நின்று ஒரு மாய யுத்தம் செய்து கொண்டிருந்தார்கள், கை சலிக்கும் வரை. இப்போதும் கூட, ஒரு சிலர் இதன் பெயரைச் சொன்னாலே காது திருப்பிக் கொள்கிறார்கள். எழுத்தில் பார்க்கும்போது கண்களை மூடிக் கொள்கிறார்கள். என்றாலும். இதன் தோற்றமும், செயல்பாடும் தமிழ் இலக்கிய வரலாற்றில் புறக்கணிக்க முடியாததொரு இடத்தைப் பெற்றுவிட்டது. இதைப் போலவேதான் ந. பிச்சமூர்த்தி, சி.சு.செல்லப்பா. க.நா.சு. போன்றவர்களைக் தொடங்கிய புதுக்கவிதை இயக்கமும். வரலாற்றை அப்படியொன்றும் எளிதாக இருட்டடிப்பு செய்துவிட முடியாது. மகாகவி பாரதி செய்யுள் சிறையிலிருந்து கவிதைக்கு விடுதலை கொடுத்தது போலவே மிகச் சிலருக்கு விளங்கக் கூடிய பூடகமான புதுக்கவிதையிலிருந்தும், கவிதைக்கு விடுதலை தந்து விசாலமானதொரு களத்தை தேடித்தந்தது வானம்பாடி இயக்கம். வாளம்பாடி இயக்கத்தின் தோற்றத்தைப் போலவே அதன் சிதைவும், சீர்குலைவும் ஒரு வரலாற்று உண்மைதான். கசப்பான உண்மை. ஒரு இன்றியமையாத் தேவை காரணமாகவே ஒரு இயக்கம் தோன்றுகிறது. அதன் காரியம் முடிந்ததும் அது அழித்து விடுகிறது. எந்த ஒரு அமைப்புதான் சாசுவதமானது? ஆனால் இவ்வளவு சீக்கிரம், இப்படி உடைந்திருக்க வேண்டாம். அதற்கான காரணங்களை, விருப்பு ஒளிவு வெறுப்பில்லாமல் மறைவில்லாமல் சொல்வதற்கான நேரம் இன்னும் வரவில்லை. அது ஒரு கசப்பான கதை. வேதனையான கதை. இப்போது அது வேண்டாம். மிகச் சமீபகாலம் வரைக்கும்கூட புதுக்கவிதையை கேலி பேசி வந்த சில சரித்திர காலத்து கவிஞர்கள் பொங்கிப் பிரவகிக்கும் புதுவெள்ளப் பெருக்குக்கு எதிராக நிற்க முடியாமல், புத்திசாலித்தனமாய், சட்டென மதம் மாறி, கொட்டி முழக்கிக் கொண்டு புதுக்கவிதைத் தேரேறி வலம் வரத்தொடங்கியிருக்கிறார்கள். வரட்டும்... வரவேற்புக் கூறுவோம். ஆனால் உண்மையான உள்ளத் துடிப்போடு இந்தச் சமுதாயத்தை கூர்ந்து பார்த்துப் பலப்பல இளைஞர்கள் புதுக்கவிதை படைக்க முன் வந்திருக்கிறார்கள் என்பது ஒரு ஆரோக்யமான சூழல். இவர்கள் மேடை மரியாதைகளை, பட்டம் பதவி பரிசுகளை எதிர்பார்த்து வந்தவர்களல்ல. எங்கெங்கோ இருந்துகொண்டு தம் இதயத்துடிப்புகளை வடித்துக் கொடுத்துத் கொண்டிருப்பவர்கள்.... இவர்களை அறிமுகப்படுத்தி விமர்சித்திருக்கிறார் நண்பர் ஆர்.பி.எஸ். சுருக்கமாக. இப்புதிய கவிஞர்களோடு பழையவர்கள் என்ன செய்து கொண்டிருக்கிறார்கள் என்பதையும் கூட குறிப்பிட்டிருக்கிறார். தேவையான, காலத்திற்கேற்ற ஒரு படைப்பு- நண்பர் யாருக்காகவும் வளைந்து கொடுக்கவில்லை என்பது ஒரு மகிழ்ச்சிக்குரிய விஷயம்.வாழ்த்துகிறேன். - புவியரசு.